Vawiinah Asapara-a Bru-te enfiah dawn

Tripura transit camp paruka Mizoram Bru-te lâk lêt tumna kal zelah, vawiin aṭang hian Asapara camp-ah enfiah hna thawh ṭan a ni dawn a, July 16, 2015 thleng enfiah an ni ang.

Asapara camp-a Bru verification ti tur hian Mamit SDC Lalfakawma leh Kolasib DSC Lalhmingliana te leh an thawhpuite an kal dawn a; Lunglei SDC erawh chu Asapara-ah Lunglei district mi an awm loh avangin a tel ve dawn lo thung. He camp-a awm­te zingah Mizorama lo kîr duh an awm chuan Tripura sorkar motor ruahman hmangin July 20-25, 2015 inkarah hruai an ni ang.

Asapara camp-a Bru enfiah hna leh lâk lêt hna thawh zawh hunah camp lian ber, Naisingpara camp leh Hazacherra camp-a mite enfiaha lak let tum an ni leh ang. Kaskau, Khakchangpara leh Hamsapara camp-ahte enfiah hna thawh a lo ni tawh a, mahse Bru zingah Mizorama kir duh an awm lo vek a ni.