Sawhthing sawngbawlna din turin thawhhona thuthlung ziah a ni

Mizoram sorkar leh Opikpure Pvt.Ltd. chuan September 20, Inrinni khan Champhai district Khuangleng rama sawhthing sawngbawlna Ginger Processing Unit din leh kalpuina tur atan thawhhona thuthlung, memorandum of understanding (MoU) an ziak a; Opikpure Pvt.Ltd-te hian kum 2026 kum tir lamah hna thawk ṭan tura inbun fel hman an tum.

Thawhhona thuthlung hi adviser to CM (handholding) Dr KC Lalmalsawmzauva pisaah ziah niin, Mizoram sorkara Commerce & Industries joint secretary Pinky Zosangpuii leh Opikpure Pvt.Ltd. Managing Director-ten hming an ziak. MoU ang chuan Opikpure Pvt.Ltd. hian Khuangleng rama industrial estate hmunah sawhthing sawngbawlna dinin, kum 10 chhung an kalpui dawn a ni.

Industrial estate hi Opikpure Pvt.Ltd hian sorkar bituk rate angin man chawiin an luah hawh dawn bakah thawktu 50% aia tlem lo chu Mizoram chhung mi an ruai dawn. An inbunna tur senso hi cheng vbc. 2.5 vel niin, nakkum kum tir lamah hna thawk ṭan tura inbun fel hman an tum. Opikpure Pvt. Ltd. hian ni zung chakna hmanga ni khata sawhthing metric ton 20 pho rona tur khawl eng emaw zat an bun dawn.

Opikpure hotute tarlan danin, an hmalakna tur chuan kut hna­thawk­tuteah organic farming uar zawka kalpuina a thlen beisei a ni a, chutianga thar chhuah thlaite chu organic certification an buaipui sak dawn bakah, sawh­thing chauh ni lo, thei leh thlai dangte pawh sawng­­bawl tel an tum bawk.