CM-in Circuit Court a hawng

Chief minister Lalduhoma chuan September 19, 2025 khan Serchhip District Court-ah a khât tâwka thubuai lian zawk ngaihtuah thei Additional District & Sessions Judge, Serchhip ṭhut ṭhinna tur 'Circuit Court' a hawng.

CM Lalduhoma chuan, Circuit Court hi court sang zawk chhawp hnaihna (accessible) leh rang zawka court rorelna (efficiency) kalpui theihna tur a nih thu a sawi a, "Thubuai hmanhmawh thlak bik tana insawrbingna (specialised justice) atan ṭangkai tak tur a ni a, a bik takin ruihhlo kaihhnawih thubuai (NDPS) leh kum tling lo kaihhnawih thubuai (POCSO) tan a ṭangkai dawn," a ti.

Serchhip district chu ram lailia awm, a rûka sumdawngten an paltlang nasat a nih thu sawiin Chief Minister chuan, "Kan hriat ṭheuh angin kan ramah ruihhlo a hluar a, ruihhlo ngai an pung zel a, thubuai ngaihtuah tur pawh pung ve zelin, thubuai pawh a lian tual tual emaw tih theih a ni a, kan Police leh Excise-te pawhin an man nasa ṭhin hle. POCSO case pawh kan ngah viau bawk," a ti a, heng thubuai ngaihtuah theihna tur court sang zawk mamawhna a san zel thu a sawi.

Mizoram sorkar chuan Novem-ber 25, 2024 khan Circuit Court dinna tur hriattirna (notification) a tichhuak a, Additional District & Sessions Judge II, Aizawl chu Serchhip hmui tura tih a ni. Hun engemaw chen kalpui ni mah se, thawktu indaih loh avang te, court room mumal tak a la awm loh avangtein chawlhsan leh rih a ni a; kumin June thla aṭang khan video conferencing hmanga kalpui leh niin, tunah chuan court room mumal tak a nei tawh a ni.

Circuit Court

■ Separation of Judiciary hi Mizoramah kum 2006 khan puan a ni a, Serchhip District Court hi kum 2009-ah kalpui ṭan a ni.

■ Judicial Magistrate First Class in a ṭhut chilh phawt a, court building hran a la awm loh vangin DC office-a room pakhat chu luah ṭhin a ni.

■ Kum 2014 khan Chief Judicial Magistrate dah ṭan a ni a; DC office aṭang hian kum 2016 khan District Court Building-ah an insawn.

■ Chief Judicial Magistrate hi district chhunga pawi khawihna thleng, kum sarih thleng hremna chin ngaithuah thei a ni.

■ Civil case pawh khawih theih a ni nain, case lian tham (session case)- tual thah, ruihhlo kaihhnawih, pawngsual, POCSO leh anticipatory bail-te a khawih thei lo.

■ Circuit Court-ah hi chuan session case-te pawh ngaihtuah theih a ni dawn.

■ Aizawl Additional District & Sessions judge-II Julie Lalrinzami'n Serchhip Circuit Court hi a hmui dawn a ni.