Minister-in thawh hreh nei lo turin zirlaite a fuih

Art & Culture Minister C Lalsawivunga chuan, zirlaite chu thawh hreh nei lo tur leh thawk loa awlsam taka sum lakluh tum lo tura fuihin, mahni zâwn ṭheuhah taima leh rim taka thawk tur leh a thlawna dawn leh sem ringawt beisei lo turin a chah.

Pang Zirlai Pawl, Joint Headquarters, Aizawl chuan September 20, Inrinni khan IPR Auditorium-ah zirlai tharte lawmna leh zirlai tiṭhate chawimawina an buatsaih a; minister C Lalsawivunga'n hmanpuiin, "Mahni zâwn ṭheuhah taima leh rim takin thawk ula, a thlâwna dawn leh sem ringawt beisei lo ang che u. Zirna hi hmasawnna rahbi pawimawh tak a ni a, ram leh hnam tan a ni tih hriain thiamna tak tak nei turin lehkha zir ang che u," a ti a, tum mumal tak neia zir tur leh Pathian ṭih tlat turin a chah a ni.

Mizorama chi bil leh hnam peng hrang hrangte chu Mizo nihnain phuar khawm zel se a duh thu sawiin Minister chuan, "In la hrang tham leh inen hrang tham kan awm lo a, hetia inpumkhat leh lungrual taka kan chenho hian hnama chhiar tham leh hnam zahawm kan nih phah a ni. Hnam anga kan din chhuah theih nan inunauna leh inpumkhatna dah pawimawh a ṭul a, mahni awmna hmun ṭheuhah ram leh hnam chhan nan theihtawp chhuah a, rinawm leh huaisen taka hmalak a ṭul," a ti.

Khualzahawm MYC chairman Malsawmzuala Ralte pawhin thu sawiin; MZP, MSU, LSA, MBSA, MSO, HSA, RSU leh SSPP aiawhte pawhin thu an sawi bawk.