Rev Dr Vanlal Nghaka Foundation-in zirlaite hnenah scholarship an hlan

September 20, Inrinni khan ATC Seminar Hall-ah Rev Dr Vanlal Nghaka Foundation chuan Pathian thu zirlai mi pathum hnenah scholarship an hlan.

Scholarship hlan inkhawm hi Rev Dr Vanlal Nghaka Foundation chairman Rev Dr K Lungmuana'n kaihruaiin, chhungkaw aiawhin Rev Dr Vanlal Nghaka fapa Dr Lalmalsawma Nghaka'n thu a sawi.

Dr Lalmalsawma chuan, zaithiam te, film siam thiam te, inkhelh thiamte chawimawi an nih ṭhin thu sawiin, "Pathian rawngbawltute hian chawimawina hi dawng ve se, tih hi kan ngaihdan a ni. Khawsak harsa tak chunga Bible zirte kan puih ve theih nan tiin hetiang ruahmanna hi kan nei a ni," a ti.

Scholarship dawngtute chu Emanuel VL Hmangaihzuala, BD II year (Alahabad Bible Seminary zirlai), Vanlalṭanpuia BD I year (Serampore College) leh Vanlalfakzuala, IV year (John Roberts Theological College zirlai) te an ni.