Minister-in Zirna Kutpui a hmanpui

Minister Vanlalhlana chuan September 20, Inrinni khan United Theological College, Bengaluru-ah Bangalore-a Mizo Students’ Association (MSA) buatsaih ‘Zirna Kûtpui’ a hmanpui. Minister chuan, thiam thil dang nei tura inzir chhunzawm zel tur leh khawvel inher danglam mila insiamrem thiam turin zirlaite a chah.

Vanlalhlana chuan, Bangalore-a Mizo zirlaite chu Mizoram pawna an awm chhan hre reng turin a chah a, "Nakin lawka kan ram leh khawtlang hruaitu turte in ni a, tun aṭanga kum eng emaw zatin hman dan hian in hmalam hun thui tak a hril dawn. Zirlaibu aṭanga thiamna hi a tâwk tawh lo a, thiam thil dang nei tura inzir chhunzawm zelin, khawvel inher danglam milin insiamrem thiam ang che u," a ti.

Zirlaite chu harsatna hrang hrang an la tawk chho dawn tih hrilhin Minister chuan, "Beidawng mai lo ula, harsatnate hi chhelna leh tumruhna nena hmachhawn zir ang che u. Kan ram pawnah eizawnna remchang (opportunity) tam tak a awm a, hnam dang zinga mi competitive tak ni tur leh discipline ṭha tak neia in awm a pawimawh dawn a ni," a ti a, sorkar hna bakah private sector-ahte pawh thiamna nei leh a ngaihna hriate tan din chhuahna tur a awm thu a sawi.

Zirna Kûtpui hi Banga-lore MSA vice president Benjamin Zorinsanga’n a kaihruai a; zirlai ti ṭhate chawimawina hun hman niin, inelna hrang hrang lawmman sem a ni bawk.