HM-in IPS-a kai tharte a kâwm

Home minister K Sapdanga chuan nimin khan a pisaah tun hnaia MPS aṭanga IPS-a kai tharte a kâwm a, a lawmpui thu a hrilh. IPS-a kai tharte hi 2015 batch AGMUT cadre pek an ni.

K Sapdanga chuan, IPS kai tharte chu Mizoram Police hmasawnna tura an theihna zawng zawng hlan turin a chah a, "Mizoram khawi hmunah pawh post pawimawh tak in chelh dawn a, in awmna hmun chu eng hmun pawh ni se, officer chhuanawm leh rintlak in nih ngei ka beisei. He ram siamṭha tur hian mawhphurhna sang tak in nei a, he ram tan hian in theihna zawng zawng hmang turin ka beisei tlat che u a ni," a ti.

IPS tling tharte pawhin thu an sawi a; IPS mawhphurhna an hmuh aṭangin rilru thar an put leh zual thu leh, Mizoram Police hmasawnna tur leh tun aia ṭha zawka a kal zel theihna tura an theihna zawng zawng hlan an inhuam thu Home Minister an hrilh.

IPS-a kai tharte chu - Zosangliana, J Lalṭhafamkima, Lalthiamsanga Sailo, K Lalremsanga leh Lalringdika te an ni.