Tualthattua puhte court-ah an inlan dawna ngaiin mipui an pungkhawm

March 29, 2025 zana Pausianmuanga (28), Champhai Bethel Veng thattua puhte chu nimin khan Champhai District Court-ah an inlan dawna an hriat avangin Champhai Bethel Veng VC leh NGO-te bultumin court tualah mipui an pungkhawm. Tualthattua puhte court-ah an inlan loh avangin thubuai ngaihtuah a ni lo.

Champhai Bethel Veng khawtlang hruaitute chuan, court lehkhaah an inlan hun a ni tih tarlan a ni vek chunga an inlan lo chu hriatthiam har an ti a; a hun taka chargesheet thehluh a nih loh hnua thubuai ngaihtuah tur ni-a ngaihtuah a ni leh lo chu thubuai tih khawtlai tumnaah an ngai.

Court bula punkhawmnaah hian boruak sosang deuh hman mah se, buaina lian tham a chhuak lo. Bethel Veng khawtlang hruaitute chuan, an veng tlangval thattua puhte chu bail-a chhuakin, zalen takin an awm nia sawiin, "An chungah harsatna eng emaw thleng palh thei a ni. Jail-ah emaw, thanaah emaw dah ni se an tan a him ber ang," an ti a, an rilru a nat thu an sawi.

Tarlan tawh angin, March 29, 2025 zan khan Pausianmuanga hi Chhangphut Field gallery aṭangin a thlang lamah a tla thla a, damdawi-in panpui a nih hnuah a hliam tuar loin a thi. He thil thleng chungchangah hian FIR thehluh a ni.

He thihna thleng chungchangah hian insual rawnna a thleng ngeia hriat a ni a, a mawhphurtua puh mi pakhat Lalruatthara, Champhai Kanan Veng nia insawi chu March 29 zan khan Champhai Police kutah a inpe. Police-in an chhui zuinaah mi dang pariat an man belh leh a ni.