KHAWTHLIR

Peaceful Rally huaihawt an tum

Mizoram sorkar hnathawk zinga New Pension Scheme hmangtute chuan Old Pension Scheme hman ve an duh a; an duhna tipuitling tura sorkar nawr nan October 1, 2025 khian Vanapa Hall kawtah 'Peaceful Rally' huaihawt an tum. Punkhawm huaihawttu hi Mizoram Movement for Old Pension Scheme an ni a, New Pension Scheme hmangtute chu tel vek turin an chah a ni.

Property tax pekna

Aizawl municipal commissioner Joseph H Lalramsanga chuan thuchhuah siamin, online-a property tax pekna siamṭhat mek a nih avangin online kaltlangin property tax pek theih a nih rih loh thu a tarlang. AMC Commissioner hian local council-te kaltlangin property tax khawn mek a nih thu leh LC-te hnenah pe ṭheuh turin Aizawla in neitute a hriattir a ni.

Nodal teacher for disaster ruat

Khawzawl bawrhsap K Vanlalṭhiana hoin nimin khan DC conference hall-ah DEO leh SDEO ten District Disaster Management Authority (DDMA) bultuma School Safety Policy, 2016 chungchanga hmalak dan tur an sawiho. A thawh khatna atan sikul tinah nodal teacher for disaster ruat ni se, an ti a; nodal officer atan district pum enkawl turin secondary school tan DEO leh elementary school tan SDEO an ruat. Chhiatna thleng thei hrang hranga inzirtirna awareness video insiamsiak buatsaih an rêl bawk.

Silai man

Assam Rifles chuan September 21, Pathianni khan police-te nen ṭang dunin Zokhawtharah silai leh a mu eng emaw zat an man niin an tarlang. AR tarlan danin, Robert Vanlalliana hnen aṭangin M4A1 Carbine leh a magazine pakhat leh Red Dot Sight 19 an man a ni.

Special assistance

Lawngtlai District Disaster Management Authority chu an chairman Donny Lalruatsanga, bawrhsap hoin nimin khan an ṭhu a; May 30, 2025 zana Lawngtlai Bazar Veng leh Chandmary-a leimin vanga chhiatna tâwkte tan sorkar laipuiah special assistance dilsak an rêl.