State Emergency Operation Centre sak tur lungphùm Minister-in a phúm

Disaster Management & Rehabilitation (DMR) minister Prof. Lalnilawma chuan nimin khan Power and Electricity engineer-in-chief pisa conference hall-ah remote control (virtual) hmangin MINECO-a Mizoram State Emergency Operation Centre (SEOC) sak tur lungphùm a phúm.

Prof. Lalnilawma chuan, khuarel chhiatna chu mihring siam chawp a nihna lai a tam zawk thu a sawi a, "Mizoramah, a bikin Aizawl khawpuia khuarel chhiatna thleng tam ber hi keimahni fimkhur loh vanga kan thlentir, man-made a ni. Leilung chunga kan kutthlak dan hian chhiatrupna thlen kawngah kawngro a su hle tih hre thar ila, kan bawlhhlawh leh tuichhe paih danah te, kan in sakna tura lei kan laih danahte mi tin i fimkhur tlâng ang u," a ti.

Mizoramah chhiatna a thleng zing ṭan tih sawiin DMR Minister chuan, "Chhiatrupna a lo thlen chânga rang taka district hrang hranga DEOC-te hmalak dan lo vil a, state level-a ruahmanna siam ngaite siamna hmun chu SEOC a ni a, a pawimawh hle. SEOC changtlung tak kan nei mai tur hi ka lawm tak zet a, lirnghinga palhah pawh SEOC hi a tlukchhiat ve a thiang lo tih rilru puin SEOC hi sak tum a ni," a ti a; contractor tur chu a ṭha thei ang bera hna thawk turin a chah.

Lungphum phumna inkhawm hi DMR director R Vanrengpuia'n a kaihruai a ni. PWD hotute tarlan danin, SEOC hi MINECO open gym bulah sak a ni dawn a, SASCI 2024-2025 aṭanga hmuh cheng vbc 18.50 senga sak tur niin, contract amount chu cheng vbc 14.90 a ni. In satu tur chu Nidhi Creative Infrastructure, Silchar an ni a, Zopa chhiara chhawng riat (G+7)-a sang a ni ang.