Thiamna leh eizawnnaa hmasawnna tur ILO-a mithiamte nen sawiho

Labour, Employment, Skill Development & Entrepreneurship (LESDE) department leh International Labour Organisation (ILO) chuan nimin khan ATI Auditorium, Aizawlah Mizote tana eizawnna leh thiamna lama hma­sawnna tur sawihona, 'Round Table Discussion on Employment, Skills & Social Protection' an buatsaih a; LESDE minister Lalnghinglova Hmar-in a hmanpui.

LESDE Minister chuan, khawvela pawl pawimawh berte zinga mi ILO nen Mizoram hmasawnna ngaihtuah a, thawkho thei tur leh thu sawiho theihna hun remchang an siam thei chu ropui a tih thu sawiin, ILO nena thawhhona chuan rah duhawm tak a chhuah zel a beisei thu a sawi a; Roundtable chhimtu ṭhalaite leh zirlaite chu an ngaihtuahna leh rilru sênga hmasawnpui tum ngei turin a chah.

Discussion hmang tur hian ILO aṭangin Deputy Director bakah, senior specialist (social security) Mariko Ouchi, senior specialist (employment) Radhicka Kapoor, specialist (labour migration) Catherine Laws, specialist (skills & employability) Gabriel Bordado leh project coordinator Radhika Sunger te an rawn kal a ni.

Round Table Discussion hawnna inkhawm hi Mizoram Youth Commission under secretary Lalramdini'n a kaihruai a, LESDE secretary Dr Lalhriatzuali Ralte-in inlawmna thu a sawi.

Sawihonaah hian thupui pathum - ''Understanding the employment landscape in Mizoram' tih te, 'Issues relating to skill development & entrepreneurship with a focus on Mizoram' tih leh, 'Social protection landscape in the State' tihte sawiho a ni a; panelist zingah ILO-a mithiamte bakah, MIzorama mithiam eng emaw zat an tel.

ILO palaite pual hian LESDE Minister chuan September 22, Thawhṭanni zan khan Warehouse Cafe, Folkland Park-ah zanriah a buatsaih a ni.