Kawng siam, chhe leh tawhte rang taka thawm ṭha turin CM-in NHIDCL a hrilh

Nimin khan CMO Conference Hall-ah chief minister Lalduhoma hoin National Highways & Infrastructure Development Corporation Limited (NHIDCL)-in Mizorama national highway an siamte leh hnathawh dante thlir letna (review meeting) neih a ni a; NH kawngpui an siam, tuna chhe leh tawhte chu rang taka thawm ṭha turin NHIDCL hotute a hrilh.

CM Lalduhawma chuan, NHIDCL leh an hnuaia contractor-te'n Mizorama NH kawng an siam zawh tawhah thawm ṭhat ngai a tam leh tawh thu sawiin, "Lirthei tana tlan harsa khawpa chhia a tam leh tawh hle," a ti a; kawng chhe leh tawhte chu contractor liability period chhunga mi vek a nih angin, rang taka thawm ṭha turin NHIDCL hotute a hrilh a ni.

Aizawl leh Vairengte inkar kawngpui chu ngaih pawimawh bikah nei turin Chief Minister chuan NHIDCL hotute a hrilh a; hmun hrang hranga khaw chhung hêlna tur kawng thar an siam zawh hnua khaw chhung kawngpui, Mizoram PWD hnena an la hlan lohte chu a rang lama hlan turin a chah.

Chief Minister chuan, tun hnaia Thingfala Mamte BCM kohhran biak-in, a thlanga NH kawngpui laih vanga chim chungchang a sawi chhuak. NHIDCL hotute chuan, Lunglei DC office-in biak-in leh bungraw chhiate hlut zawng an chhût chhuak tawh a, assessment chu Project Management Unit-ah thehlut tawhin, PMU-in NHIDCL Headquarters-ah an kaltir zel tur thu an sawi.

CM Lalduhoma chuan, rigid pavement hmanga kawngpui siam tawh tura sorkar laipuia a rawtna chu zir chiang tura hma la thuai turin a chah bawk a; Mizorama rigid pavement hmanga kawngpui siam chungchang zir chiang turin Road Transport and Highways minister Nitin Gadkari-a'n NHIDCL a hrilh tawh thu a sawi.

NHIDCL regional executive director Adelbert Susngi chuan Chief Minister-in hna hmanhmawhthlak leh ngaih pawimawh bik a sawite chu chak taka an bawhzui tur thu a sawi a ni.

NHIDCL hotute chuan hna an thawhna hmun hrang hranga harsatna an tawhte Chief Minister an hrilh a; Mizoram Power & Electricity department nena hmalakho an mamawhna hmun te, ram neitu chiang lo chinfel ngai te, Aizawl Eastern Side Bypass Road laih tura harsatna an tawh te, zangnadawmna chungchanga harsatna an tawh te, mi ṭhenkhatin kutthlak an phal loh vanga hna an thawh theih lohna hmun te, chak zawka hna an thawh theih nana an mamawhte an tarlang.

Ṭhutkhawmah hian PWD minister Vanlalhlana, secretary to CM Vanlaldina Fanai, PE secretary K Lalrinzuali leh PWD, PE leh NHIDCL hotute an tel a ni.