KHAWTHLIR

Poshan Maah

Central Bureau of Communication Field Office, Aizawl chuan nimin khan MINECO Anganwadi Centre-ah Rashtriya Poshan Maah hman mek pualin hun an hmang. CBC Field office in-charge Lalginlen Lhouvum chuan hmanpuiin, aganwadi worker leh helper te, naupang te, nu leh pa leh khawtlang hruaitute an tel a; nu hnute pawimawhna te, ei leh in tur hrisel leh hriselna atana ṭha lote inzirtir a ni.

MLA-in enpui

Champhai South bialtu MLA Lt.Col. Clement Lalhmingthanga chuan nimin khan a bial chhunga Zokhawthar panna kawng, Melbuk khaw inkara lei tlak hniamna hmun chu siamṭhat a nih theih dan tur a enpui.

Land Committee

Hnahthial bawrhsap K Vanlalruati kaihhruaiin Land Committee chu nimin khan an ṭhu a; house pass dilna panga leh periodic patta dilna 40 an ngaihtuah. Kumin August-September chhung hian LSC 40, house pass pathum leh periodic patta 27 pek chhuah a nih tawh thu tarlan a ni.

Poshan Maah Rally

Rashtriya Poshan Maah hman mekah nimin khan Serchhhipah kawngzawh leh signature campaign huaihawt a ni. Kawngzawh hi Serchhip AOC kâwn aṭanga Bazar traffic point thleng neih niin, DCPU te, OSC te, Shakti Sadan te, CDPO, Serchhip ICDS office-a thawkte leh anganwadi worker leh helper te an tel. Rally hi hriselna atana taksa sawizawi pawimawhzia inzirtirna atana buatsaih a ni a; hriselna atana intiamna signature campaign neih nghal a ni.

Chawimawina dawng

Elvis Lalthangzuala, Lawngtlai Council Veng chuan World Record of Excellence, England aṭangin chawimawina 'Certificate of Appreciation' a dawng. Chawimawina hi khaw-tlang leh mihringpuite chawisanna kawnga a thawh hlâwk vanga dawng a ni a, September 21, 2025 khan New Delhi-ah hlan a ni. Elvis Lalthangzuala hi Rauthla chanchinbu editor a ni a, MJA, Lawngtlai District president a ni mek.