National Ayurveda Day hman a ni

Nimin kha National Ayurveda Day vawi 10-na a ni a, National AYUSH Mission, Mizoram buatsaihin Vanapa Hall-ah hman a ni a, Health & Family Welfare minister Lalrinpuii'n a hmanpui. Kumina Ayurveda Day thupui chu ‘Ayurveda for people and planet’ (Mihring leh khawvel tan Ayurveda) tih a ni.

Lalrinpuii chuan, Ayurveda chu natna enkawlna mai ni loin, nun dan ṭha inzirtirna a nih thu a sawi a, "A thu ril ber chu hriselna vawnhim a ni. Mizote'n hriselna kan vawn uluk a pawimawh a, insawizawi leh kut hnathawh te, thahrui hman tam theihna lamte kan uar thar a ngai. Nun thlahdahna hian natna inkai chhâwn theih loh - zunthlum, thisen sang leh a dangte a thlen a, thihpui pawh kan tam tawh. Natna enkawl tlukin natna laka inven a pawimawh a ni," a ti.

Thiamna hmangin ramhmul damdawi ṭhatnate hmuh chhuah zel a nih thu sawiin Minister chuan, "Ayurveda hi India-in mihringte hnena a thilpek hlu tak a ni a, hemi hmanga hriselna hi mi tin tan a ni a, belhchian tlak a ni. Mizoram kan vannei a, ramhmul damdawi chi hrang hrang kan nei a, ramhmul damdawite hi zir chian a, humhalh leh chîn pun kan uar a pawimawh," a ti a, ram danga thawn chhuak thei khawpa tihpun a ṭul thu a sawi.

Lalrinpuii chuan, Kulikawn leh Saitualah Ayush Hospital sak mek a nih thu leh ruahmanna dang panga kaltir leh mek a nih thu a sawi a; AYUSH doctor leh thawktu te, AYUSH damdawi-in leh health & wellness centre 41-a thawk mekte chungah a lawm thu a sawi bawk.

National Ayurveda Day hmannaah hian Health secretary H Lalengmawia pawhin thu a sawi a, Mizoram State Council for Indian System of Medicines registrar Dr V Malsawmpuii'n Ayurveda chungchang a sawifiah. Civil Hospital, Aizawla medical officer (AYUSH) Dr Laltlankimi Ralte leh Lengpui PHC-a medical officer (AYUSH) Dr VL Remruati ten Ayurveda hmanga damlo an enkawlte chungchang an sawi a ni.