Rs 5,00,000 chawi turin NIC hrem

Mizoram State Consumer Dispute Redressal Commission (State Consumer Court) chuan National Insurance Company Ltd chu an tih tur an tih ṭhat loh avangin Rs 5,00,000 chawi turin a hrem.

State Consumer Dispute Redressal Commission tarlan danin, ZD Lalremthanga, Vaivakawn chuan a in chu leiminin a tihchhiat hlauhthawn thilah September 9, 2019 khan National Insurance Company-ah Standard Fire & Special Peril insurance policy Rs 32,450-in a lei a, in a chhiat veka cheng nuai 100 hmuh theihna a ni.

ZD Lalremthanga'n policy a lei chu a remtihna tel loin National Insurance Company chuan April 24, 2020 khan an titawp (cancel) a; premium Rs 32,450 a pek tawh pawh pek let tumin a bank account thehlut turin an ti a, mahse, a thehlut duh lo.

Leimin vangin ZD Lalremthanga in chu a chhia a, March 5, 2021 khan NIC-ah zangnadawmna a dil a, mahse, NIC chuan an hnawlsak a ni. ZD Lalremthanga chu Consumer Court-ah a zualko zui a; Consumer Court chuan NIC chu ni 60 chhungin ZD Lalremthanga hnenah zangnadawmna Rs 5,00,000 pe turin thu a pe ta a ni.