Cheng nuai 64.36 hû ruihhlo hâl

Khawzawl district-a ruihhlo man, court-in a chinfel tawh cheng nuai 64 chuang hû chu nimin khan bawrhsap K Vanlalṭhiana leh SP F Lalbiakzauva te hoin Krishi Vigyan Kendra (KVK), Khawzawlah hâl a ni.

Ruihhlo hâl ralte chu kumin January leh July inkara mante a ni a; heroin gram 84, methamphetamine kg 4.842 (mûm 40,400) leh ganja gram 4,011 te a ni a, a vaiin Rs 64,36,655 hûa chhût a ni. Ruihhlo kaihhnawihah hian mi pasarih man niin, thubuai paruk ziah luh a ni.

Bawrhsap K Vanlalṭhiana chuan, ruihhlo mantu Police leh Excise & Narcotics mi leh sate fakawm a tih thu sawiin, hun lo kal leh zel turah nasa zawka ṭan la a, theihtawp chhuah zel turin a chah a; sum thianghlim zawk la lut tura rilru leh taksa hrisel neih a pawimawh thu leh, ruihhlo zuartute leh hmangtute'n sim ngei se a duh thu a sawi.

Ruihhlo hâlna inkhawm hi Khawzawl SP F Lalbiakzauva'n a kaihruai a; Excise & Narcotics assistant commissioner C Thangchuanga leh MHIP Sub-Hqrs aiawhin Lalrinthangi te pawhin thu an sawi a ni.