DC hoin NH kawng chhe lai enfiah

Kolasib bawrhsap Robert C Lalhmangaiha leh thuneitute chuan nimin zing khan Kolasib district-a national highway (NH) chhe laite a hmunah an enfiah a; kawngpui ṭha leh tlo zawk neih a nih theihna tura hmalak dan tur an sawiho nghal.

Kawng chhe lai enfiah hi September 9, 2025-a Kolasib bialtu MLA Lalfamkima, deputy speaker hoa NH thawm ṭhat hna thawh chungchanga ṭhutkhawma thurel bawhzuina a ni a; kawng chhe zual lai bikte leh leilung nghet lote tlo zawka siam dan tur leh pavement quality concrete (PQC) hman a ṭulnate a hmuna enfiah a ni.

Kawng endiknaah hian Kolasib leh a chhehvêla kawng chhe zual lai, leilung nghet tâwk lo te, kawng hnuai aṭanga tui pûtte leh tuihawk luankawr mumal loh vanga kawng thawm ṭhat pawh a ṭha rei thei lo, a bika PQC a tih tura dilna thlen tur laite en a ni.

NHIDCL chu an work schedule-ah change of scope (selected locations-ah BC aṭangin PQC tûrin) siampui a ni a, ruahmannate chu NHIDCL-in an hotu lian lamah an thlen leh ang.

NHIDCL aiawhte chuan, nimin ziunga kawngpui enfiahnaa hmalak ngai an sawite chu an hotute hnenah a rang lamah an thlen tur thu an sawi.