World Alzheimer’s Day hman a ni

Alzheimer and Related Disorders Society of India (ARDSI), Mizoram Chapter buatsaihin nimin khan Chanmari YMA Hall, Aizawlah World Alzheimer’s Day hman a ni a, Health & Family Welfare minister Lalrinpuii'n a hmanpui.

Health Minister chuan, mihring dam hun chhung a rei tial tial a, kum upa an pun zel thu sawiin, "Natna chi hrang hrangin a tlakbuak ṭhin. Kum upate’n natna an vei zinga enkawl leh buaipui ngai em em pakhat chu alzheimer a ni. He natna veite enkawlnaah chhungkua, ṭhenawm khawveng leh kawtlang hriatthiamna leh inṭawiawm tawnna a pawimawh," a ti.

Alzheimer’s Day hman chuan alzheimer chungchang hriatna zau zawk te, a hun taka natna hmuh chhuah leh natna veite enkawlna ṭha zawk a thlen ngei a beisei thu sawiin Lalrinpuii chuan, "Alzheimer hi cancer leh natna dang anga natna chi khat thluak sáwng natna a ni," a ti a, natna veite chu enhrang mai lo a, khawtlang leh mipuiin an hriatthiam a pawimawh thu a sawi.

World Alzheimer’s Day hmanna inkhawm hi ARDSI vice president Dr Robert L Khawlhring-in a kaihruai a, Health Minister hian alzheimer chungchang slogan/poster presentation intihsiakna a ti ṭhate hnenah lawmman a hlan.

ARDSI, Mizoram Chapter hian phungbawm sawmin alzheimer natna sawihona leh natna vei enkawltute zirna seminar leh workshop-te an hmang ṭhin. Mizoram hmun hrang hrangah MUP, YMA leh kohhrante nen alzheimer natna veite chhinchhiahin an tlawh chhuak ṭhin a, an thihin an rál ṭhin bawk.

ARDSI, Mizoram Chapter-ah hian a duh tan member a nih theih a, life member ni duh tan membership fee Rs 1,000 a ni a, annual member tan Rs 100 a ni. Harsatna leh zawh duh neite tan ARDSI counsellor-te phone number 7005983633 leh 9366191341-ah biak theih reng a ni tih an tarlang.