Kawngpui siam dan tur enfiah

Aizawl North-III bialtu MLA K Sapdanga, minister chuan nimin khan a bial chhunga Edenthar Venga inkalpawhna kawngpui siam dan tur a enfiah a; bialtu corporator H Lalremtluanga, PWD hotute leh Edenthar Veng Local Council ten an ṭawiawm.

K Sapdanga chuan, Edenthar Veng chhung kawngpui chhe lutuk chu a rang thei ang bera siam turin ruahman mek a nih thu a sawi a, "PWD lamah pawh a theih ang angin ka bawhzui zel dawn a, veng mipuite'n an nghahhlelh thu pawh ka hria. Siam hma ngeia PWD hotute nena rawn en ṭul ka ti a, kawngpui hi siam thuai a nih theih nan chak takin kan bawhzui zel dawn," a ti.

Minister hian Edenthar Veng Primary School pawh a tlawh nghal a, "Ka bial chhungah Education department lamin model school thlang turin min ti a, Mizorama sorkar primary school zinga zirlai ngah ber Edenthar Primary School hi ka thlang a ni," a ti a; sikul hmasawnna tur hian theihtawp chhuah zel a tum thu an sawi.

Aizawl North-III Bialtu MLA chuan, zirtirtu te, local council leh ZPM party hruaitute'n zirtirtu an indaih loh thu an hrilh tih sawiin, "A hmun ngeiah a takin ka rawn hmu ta a, kum khat chhung atan zirtitirtu pahnih rawihna tur ka MLA fund aṭangin kan ti ang. Zirna pawhin hma a sawn phah ngei ka beisei tlat a ni," a ti.