Jordan Centre-ah Synod duh dan Mizoram sorkarin a pawmpui

Seṭhawna ruihhlo ngaite enkawlna hmun Jordan Centre enkawl tura Mizoram Synod-in duh dan an neihte chu Mizoram sorkarin a pawmpui tawh.

Jordan Centre enkawl chungchangah hian a neitu department - Social Welfare department chuan Synod hotute an dawr a, an enkawl duh leh duh loh an zawt a ni. Synod chuan a hmunhmate enfiahin, a zir chiang tur committee-te an ruat a ni.

Zir chiangtute'n an zir chian hnuah Synod chuan, Jordan Centre enkawl tura duh dan an neihte Social Welfare department-ah an thlen ve leh a; chu chu sorkar chuan an pawmpui tawh.

Hetih lai hian, Jordan Centre an enkawl dawn leh dawn loh hi Synod Executive Committee (SEC)-ah rel a ni dawn a; SEC thutlukna azirin Mizoram sorkar chuan Jordan Centre kal zel dan tur an ngaituah ang.

Social Welfare department chuan Baptist Church of Mizoram, Lairam Isua Krista Baptist Kohhran (LIKBK) leh Evangelical Church of Maraland (ECM) ten home an enkawl lai chu ruihhlo ngaite enkawl zuina (after care) atan an dil bawk.

Kohhran hrang hrangte hian sum mamawh leh a ṭul angte Social Welfare department-ah an thehlut a, Social Welfare lamin Finance department-ah ruahanna an thehlut ve leh bawk a ni.