Aizawl tâwt tihziaawmna tura ruahmanna UDPA Minister kaihhruaiin sawiho a ni

Nimin khan UDPA minister K Sapdanga kaihhruaiin Vaivakawn Auditorium-ah Aizawl Sustainable Urban Transport Project (ASUTP) hnuaia hmalakna leh, Temple Square leh Vaivakawn inkar kawng thawm ṭhatna tura ruahmannate sawihona leh inhrilhfiahna ‘Sensitization Meeting on Corridor & Junction Improvement Project under ASUTP’ buatsaih a ni.

Sawihona leh inhrilhfiahnaah hian Aizawl West-II bialtu Lalnghinglova Hmar, minister of state, UDPA secretary Lalmalsawma Pachuau, UDPA department leh PWD hotute bakah Tuikual, Dinthar, Dawrpui Vengthar leh Vaivakawn khawtlang hruaitute an tel.

UDPA Minister chuan, ASUTP-in a tum ber chu Aizawl khawpui a nawm zawk theih nan leh traffic jam nasa ṭhinte a ziaawm zawk theih nana kawng tihzauh belh te, him taka mipui an chet vel theih nana kalna nuam, footpath ṭha leh changkang zawk siamte a nih thu a sawi.

ASUTP hnuaiah hian tun dinhmunah Temple leh Vaivakawn inkar kawng bakah, Bawngkawn leh Kulikawn inkar kawngte thawm ṭhatna tura ruahmanna siam mek a nih thu sawiin, K Sapdanga chuan, ruahmannate a hlawhtlin thuai theih nan khawtlang hruaitute chu theihtawp lo chhuah ve tur leh kawngpui tihnawk zawnga lirthei dah ṭhinte vil uluk lehzual turin a ngen.

Lalnghinglova Hmar pawhin thu sawiin, "He project hi mipui ta, mipui ṭhat tlanna tur a nih avangin thawhhona ṭha a pawimawh dawn. Veng mipuite'n theihtawp chhuaha an ṭawiawm zel ka beisei," a ti.

Sawihona leh inhrilhfiahna hunah ASUTP buaipui tura sorkarin a rawih Mott Macdonald Consultancy aiawh leh programme coordinator HVL Zarzoenga ten Temple Square leh Vaivakawn inkar kawng (km 1.87) tihhmasawnna tura ruahmannate a lem nen an sawifiah a ni.

Khawtlang hruaitute duh dan leh ngaihdante ngaihthlak niin, ruahmanna (DPR) siamnaah an tel ve theih nan kawng hawnsak an ni.

Ruahmannate :

■ Dawrpui Vengthar kawng pengṭhuam tih zauh.

■ Temple - Vaivakawn inkar kea kalna kawng thawmṭhat.

■ Step - 22 awmte thawmṭhat.

■ Parking zone leh bus dinna changtlung zawka siam.

■ Retaining wall thawmṭhat ngaite thawmṭhat