Minister-in Smart City hnathawhte a enfiah

UDPA minister K Sapdanga chuan September 23, Thawhlehni khan Aizawl Smart City Ltd. office tlawhin, Aizawl Smart City Ltd hnuaia project kal lai mekte hnathawh dan a enfiah.

K Sapdanga chuan, Aizawl Smart City Ltd chu sorkar laipui aṭangin tihtawp a nih tawh thu a sawi a, "Mizoram sorkar chuan kum khat atan March, 2026 thleng a pawtsei a, in hnathawh a lungawi thlak loh chuan tihtawp mai theih a nih avangin pawhsei zel tlak ni turin ṭan la lehzual ang che u," a ti a, hun bituk chhunga project-te thawh zawh ṭhin a pawimawh thu a sawi.

Aizawl Smart City chief executive officer CC Lalchhuangkima chuan Smart City hnuaia project hna thawh mek 16-te dinhmun tlangpui a sawifiah. Project tam zawk chu March 2026 chhunga zawh hman an inbeisei thu te, hmanraw ṭhenkhat Mizoram pawn leh India ram pawn aṭanga lak luh ngai a awm avangin beisei aia hun a duh rei ṭhin thu leh project tlema zawng chu hun bituk chhunga an zawh theih loh tur thu sawi bawk.

UDPA Minister hi UDPA secretary Lalmalsawma Pachuau, joint secretary Zarzo­kimi leh director Jacob Lalawmpuia ten an ṭawiawm a ni.