MLA-in ar note leh a chaw a sem

Aizawl West-I bialtu MLA TBC Lalvenchhunga chuan nimin khan a bial chhung Rangvamualah ar note leh a chaw a sem.

TBC Lalvenchhunga chuan a thil sem chu tam tham ni lo mah se, a dawngtute'n bul ṭan nan ṭangkai taka an hman ngei a beisei thu a sawi a, "Rangvamuala ar note kan sem hi pilot project a ni a, a hlawhtlin dan azirin Phunchawng leh veng ṭhenkhatah hmalak chhunzawm zel tur a ni," a ti a, ṭha taka hma la tur leh bulṭan nan hmang ngei turin a dawngtute chu a fuih.

Krismas boruak vuakvet thlir chunga he project hi kalpui a nih thu sawiin TBC Lalvenchhunga chuan, "Thla thum chhung hian ar hi hralh a tlin ngei kan beisei a, a market lamah pawh harsatna a awm loh kan beisei. Khawtlang hruaitute leh kan unit hruaitute'n an vil dawn a, mamawh leh harsatna a awm chuan inhrilh tawn zel ang u," a ti.

Aizawl West-I Bialtu MLA hian chhungkaw thlan chhuah parukte hnenah ar note 100 ṭheuh, ar chaw ip hnih ṭheuh leh tui pekna a sem a ni.