AMC draft roll tlangzarh a ni

Aizawl district municipal election officer Lalhriatpuia, district bawrhsap chuan nimin khan DC conference hall-ah Aizawl Municipal Corporation (AMC) Draft Electoral Rolls for Summary Revision of Electoral Rolls, 2026 a tlangzarh. AMC draft roll-ah hian voter 2,34,600 an awm a, mipa 1,08,649 leh hmeichhia 1,25,951 an ni.

AMC draft electoral roll hi MLA e-roll 2022 behchhana siam a ni a; siamṭhat, insawn, paih ngai leh inthun thar duh tan October 25, 2025 thleng Local Level Officer hnenah dilna thehluh theih a ni. Final roll chu January 7, 2026-ah tlangzarh tura ruahman a ni. AMC final electoral roll hi MLA electoral roll atan rin nghal theih a ni lo.

Lalhriatpuia chuan, democracy rama inthlanna felfai, langtlang leh thianghlim nei tur chuan e-roll thianghlim leh felfai aṭanga bul ṭan a ṭul thu a sawi a, "Final electoral roll felfai leh thianghlim tak kan neih theih nan political party, tlawmngai pawl leh Local Council-te thawhpuina leh ṭawiawmna kan mamawh leh nasa dawn hle," a ti a, thawhpui zel turin a ngen.

Draft roll tlangzarh­naah hian sorkar hotute bakah tlawmngai pawl leh political party hrang hrang aiawhte an tel a ni.