Swachhata Hi Seva Faina Hapta hawng

Urban Development and Poverty Alleviation (UDPA) minister K Sapdanga chuan nimin zing khan MINECO Open Gym tualah Swachhata Hi Seva hmalakna kal meka Faina Hapta a hawng.

K Sapdanga chuan, faina chungchang inzirtir­na chu a tam tâwk viau tawh thu a sawi a, "Tuna kan tih tur ni ta chu, faina hi mi tinin kan nunpui ṭheuh a, fainain min chenchilh a ngai tawh. Faina Hapta kan hman chhungin khua leh tuite chuan kan awmna hmun ṭheuhah phûr takin faina kawngah hma la ṭheuh ila, faina hapta a liam hnu pawhin faina kan ngaih pawimawh chhunzawm zel a ṭul," a ti.

UDPA Minister chuan, ni tin khaw-saknaah faina nunpui chhunzawm zel a pawimawh dawn thu a sawi a; mimal, veng, khawtlang, pawl, zirna-in, kohhran leh sorkar department-te chu Faina Hapta chhunga hma laho turin a ngen.

Faina Hapta pual hian MLA leh corporator-te chuan an bial chhungah hmalak an tum a; faina intihsiak puangin, intihsiaka ti ṭhate hnenah October 2, 2025-a Swacch Bharat Diwas khârna-ah lawmman hlan a ni ang.

Faina hnatlang khuhhawnna hi UDPA secretary Lalmalsawma Pachuau-in a kaihruai a; hnatlang rûnpui hawnna atan MINECO huam chhung hmun pali-ah faina hnatlang buatsaih nghal. Hnatlangah hian MINECO Branch YMA member-te leh sorkar department mi leh sa an thawk chhuak a, mi 250 rualin bawlhlawh quintal 11.30 an chhar khawm a ni.

Hawnna inkhawmah hian HDFC Bank chuan an CSR hmanga khawlaia bawlhhlawh hîp khawmna lirthei - Garbage Vacuum Truck an lei chu UDPA Minister hnenah an hlan nghal bawk.

Swachhata Hi Seva Faina Hapta hi nimin vek khan district khawpui dangahte pawh hman a ni a, faina hnatlang huaihawt nghal niin, mi ṭhahnem tak an thawk chhuak a ni.