KHAWTHLIR

Thisen pe

MZU NSS unit chuan MZU campus-ah thisen pek an huaihawt a, Civil Hospital, Aizawl tan thisen unit 96 an pe a, petute hmeichhia 50 leh mipa 46 an ni. RIPANS zirlaite pawhin September 24, Nilaini khan ZMCH blood bank tan thisen unit 75 an pe a, petute mipa 39 leh hmeichhia 36 an ni.

Parade competition

Aizawl City College Joint Students’ Union chuan an kum 25-na, silver jubilee pualin nimin khan 1st MAP Ground, Armed Vengah NCC Inter College Contingent & Individual Parade Competition an buatsaih a, Siaha bialtu MLA Dr K Beichhua'n a hmanpui.

Sahbawn siam zir

Hnahthial College Eco Club leh KVK, Hnahthial ṭang dun chuan nimin khan sahbawn siam dan zirhona, 'Training on Eco-Friendly Soap Making' an buatsaih a; KVK subject matter specialist Zonunkimi Ralte leh Vanlalruati Ralte ten college zirlaite chu hnim leh thlai hmanga sahbawn siam dan an zirtir a ni.

Ṭanpuina sem

Aizawl South-II bialtu MLA Lalchhuanthanga chuan nimin khan a bial chhunga Salem Veng Health Sub-Centre, Damveng Sub-Centre leh Middle School, Tlangnuam West Local Council, Tuikhuahtlang Anganwadi Centre leh Kulikawn Anganwadi Centre te a tlawh a; mamawh bungrua chi hrang hrang bakah, mimal eizawnna atan mi 10 hnenah puantah khawl a hlan.

BJP-in home ṭanpui

BJP, Mizoram Pradesh chuan Sewa Pakhwada campaign kal zelah nimin khan 'Divyang Vyaktiyon Ka Samman' programme pualin Gilead Special School, Bawngkawn an tlawh a, ei tur chi hrang hrang an pe. Aizawla an isaah BJP din a nih theih nana sûlsutute zinga mi Deendayal Upadhyaya pian champha an lawm bawk.