Tar enkawlnaah mi 79 dah lut tawh

Governor Gen. Dr Vijay Kumar Singh chuan nimin khan Raj Bhavan-ah Social Welfare department hotute a kâwm a, upate enkawlna kalpui dan leh pension pek dan a sawipui. Mizoramah Indira Gandhi National Old Age Pension Scheme dawngtu mi 24,524 an awm mek thu leh State Senior Citizens Home-ah mi 79 dah luh an nih tawh thu tarlan a ni.

Larsap chuan, Mizo khawtlangin upate ngaihsaka a dah pawimawh thiam ṭhin chu ṭha a tih thu a sawi a, "Kum upate hi a tlangpuiin chhungte nei leh enkawlna ṭha dawng ni mah se, baihvai an awm chânga an tlûk luh ngamna tur hmun changtlung tak neih a ṭul a, mal ngawih ngawiha inhriatna leh ṭangkai lo nia inngaihnate tihbosak a ṭul," a ti.

Upate'n harsatna an tawhte ngaithlaa kaihruai turin councellor pek chu tihmakmawh a nih thu sawiin Gen. VK Singh chuan, "Nu leh pate kalsan mai loa ngaiksak a, hmangaih taka enkawl chu mi tin mawhphurhna a ni," a ti a; Social Welfare department-in harsatna an tawh leh mamawh an thlente a ṭul ang zela bawhzui a tum thu a sawi.

Social Welfare department hotute tarlan danin, Mizoramah tar pension (Indira Gandhi National Old Age Pension Scheme) dawng mi 24,524 an awm mek. Kum 1989-a din State Senior Citizens Home, Aizawl, mi 10 awm theihnaah mi pakua an awm mek a; Home-ah hian din a nih aṭangin mi 79 dah luh tawh niin, mipa 53 leh hmeichhia 26 an ni.

Tar pension bakah National Social Assistance Programme (NSAP) hnuaia scheme dang - Indira Gandhi National Widow Pension Scheme (hmeithai pension), Indira Gandhi National Disability Pension Scheme (rualbanlo pension) leh National Family Benefit Scheme (chhungkuaa eizawngtu ber a thiha chhawmdawlna) hnuaia ṭanpuina pek ṭhinah state sorkarin a tum ve tura tih chu April 1, 2024-ah Mizoram sorkarin Rs 100 aṭangin Rs 1,000-ah a tisang. Sorkar laipuiin a ve tur pawh tihsan a ṭul thu Social Welfare hotute chuan Governor an hrilh.

Ṭhukhawmah hian upate enkawlna kalpui dan leh an tana hamṭhatnate buaipuinaa hmalak ṭulte sawiho a ni a; rilru lama harsatna an tawh loh nana Senior Citizens Home-a counselling service kalpui a ṭul thu te, changtlung leh lian zawk upate enkawlna home ruahman lâwk a ṭul thu te, day care centre, palliative care training leh ṭul dangte sawiho a ni bawk.

Governor hnenah hian Social Welfare joint director Caroline Hmingthanzuali leh assistant director Zomuanpuii ten upate enkawlna leh tar pension chungchanga department hmalaknate an hrilhfiah a ni.

MIZORAM DINHMUN

* Tar pension hamṭhatna dawngtu mi 24,524 an awm mek.

* Kum 60-79 inkar mi 15,393 awmin, thla tin Rs 1,200 an dawng a; Mizoram sorkarin Rs 1,000 tumin, sorkar laipuiin Rs 200 a tum.

* Upa pension dawng kum 80 chin chung lam mi 9,131 an awm a, thla tin Rs 1,500 an dawng a; Mizoram sorkarin Rs 1,000 leh sorkar laipuiin Rs 500 an thawh.

* State Senior Citizens Home, Aizawlah thawktu 10-in mipa paruk leh hmeichhia pathum, an vaiin mi pakua an enkawl mek.

* Senior Citizens Home-ah hian mi 79 enkawl ni tawhin, mipa 53 leh hmeichhia 26 an ni a, upa ber chu kum 96 mi a ni.