ILP endikna hmunte tichangtlung turin MSU-in Home Minister ngen

Sairang thlenga rêl a luh tawh avangin Mizo Students’ Union (MSU) Gen. Hqrs hruaitute chuan Mizo mipui him zawk nan inner line permit (ILP) endikna hmunte tichangtlung turin Home minister K Sapdanga an ngen.

MSU hruaitute chuan nimin khan Home Minister a pisaah an hmu a; "Mizoram chhunga Sairang thlenga rêl a lo luh tak avanga hnam dangte'n min chîm nasat dawn avang leh, Mizo mipui kan him tlan zawk nan ILP check point thuam chak a, tihchangtlun a nih theih nan hma la turin kan ngen a ni," an ti.

MSU hruaitute hian Sairang Sihhmuiah chauh ni lo, Sihhmui leh Phunchawng inkarah pawh ILP endikna (check point) siam turin Home Minister an ngen a; ILP check point ni lo, a rûka rawn lut an awm theih venthâwn thilah Serkhanah ILP check point siam turin an ngen bawk.

Mizoram rawn tlawhtu khualzinte'n ILP kalphung mumal leh ṭha zawk an neih theih nan hma la turin Home Minister an ngen tih sawiin MSU chuan, "Tourist-te tan bika hman theih tur tourist ILP a hranpaa duan a nih theih nan temporary ILP kan neih mek hi ennawna siamṭhat a nih theih nan Home Minister kan ngen," an ti.

MSU chuan, an ngennate chu Home Minister-in ṭha a tih thu leh hmalak a tum thu a lo hrilh niin an tarlang a; tourist ILP chungchangah, Tourism Minister sawipui a tum thu a lo hrilh tih an tarlang bawk.