World Pharmacists Day hman a ni

Nimin September 25 kha World Pharmacists Day a ni a, Mizoram State Pharmacy Council (MSPC) buatsaihin Vanapa Hall-ah hman niin, Health & Family Welfare minister Lalrinpuii'n a hmanpui.

Khuallian Lalrinpuii chuan, sorkarin pharmacist 17 (contract), assistant director pathum leh Drugs Testing Laboratory-a thawk tur junior analyst pathum lakna tur buaipui mek a nih thu a sawi a, "Heng bakah hian Mizorama PHC, CHC leh district hospital tinah pharmacist dah vek tura hmalak a ni. Mizorama cancer tam lutuk chhan zirchianna nei tura hmalak tum a ni a, pharmacist-te an pawimawh hle dawn," a ti.

Health Minister chuan, pharmacist-te pawimawh thu sawiin, "Damdawi siam dan aṭanga mipui hnena hralh chhuah dan thlenga thiamna bik nei an nih avangin an pawimawh hle," a ti a; healthcare system chu pharmacist-te tel loin a kal theih loh thu a sawi.

Damdawi vawn leh ei chungchangah uluk a pawimawh thu sawiin Lalrinpuii chuan, "Damdawite hi a nih dan tur ang taka temperature, humidity leh ni êngahte vawn ṭhat a nih loh emaw, ei hun leh ei dan dik taka ei a nih loh emaw chuan a chakna leh hnathawh dante a danglam thei a, nunna hialin a tuar thei. Danin a phût angin damdawi dawr rêng rêng pharmacist dik takte ngeiin nghakin, an hun pumin damdawi dawr an vil vek tur a ni," a ti.

Inkhawm hi MSPC hruaitu F Lallian-tluanga'n a kaihruai a; khualzahawm Dr Sanjay D Sawant, RIPANS director leh MSPC vice president Dr H Lalhlenmawia te pawhin thu an sawi.

World Pharmacists Day hmannaah hian Mizorama pharmacy zirna - RIPANS, Laithangpuii College of Pharmacy, Mizoram Institute of Pharmaceutical Sciences, Blessino Pharmacy Institute zirlaite leh pharmacist hna thawk laite an tel a ni.