CM leh US Consulate General inkawm

September 24, Ningani khan chief minister Lalduhoma chuan a pisaah Mizoram tlawha rawn zin mek Kolkata-a US consulate general Kathy Giles Diaz a kawm a, Mizoram a rawn tlawh avanga lawmthu hrilhin, hun nuam tak hmang turin duhsakna a hlan.

Kathy Giles Diaz hian Mizoram chu mawi a tih thu leh rawn tlawh a châk ṭhin thu a sawi a, "US-ah Mizo hnahthlak tam tak an awm a, an awmna hmunah khua leh tui ṭha an ni zel. Chutianga inzawmna ṭha tak nei kan nih avang chuan rawn kal hi ka châk zual a ni," a ti a, Mizoramah US company-te tana investment kalpui theihna chi a awm a nih chuan a ṭul anga ṭanpui a inhuam thu CM hi a hrilh.

Chief Minister chuan investment lama Mizoram ṭanpui a inhuamnaah lawmthu hrilhin, "Foreign funding hmalakna lam chi reng reng chu Central sorkar remtihna hnuaia kalpui vek a ni. Mizo hnahthlak US a cheng an tam tawh a, chuvangin Mizoram mipuite zingah US tlawh duh an tam ve tial tial," a ti a, inpawh taka thawhho ṭul a tih thu a sawi.

Kolkata-a US consul general Kathy Hiles Diaz leh a thawhpuite hian nimin khan Central YMA Office tlawhin, Central YMA president Lalhmachhuana leh hruaitu dangten an lo dawngsawng.

Central YMA hruaitute hian Mizo ṭhalaite tana engemaw tal ruahmanna siamsak dan kawng zawn sak turin an ngen a, YMA-in raltlan a lo buaipui dante an sawipui.

Kathy Giles Diaz pawhin YMA-in Mizo mipui tana a hnathawhte fakin, ropui a tih thu a sawi.