KHAWTHLIR

MJA Button Badge

Mizoram Journalist Association (MJA) Coordination Committee vawi 15-na chu MJA Gen. Hqrs president C Lalrambuatsaiha kaihhruaiin nimin khan Aizawl Press Club-ah an ṭhukhawm. MJA General Conference, 2025 rorel bawhzui dante thlirho niin, kum 2025-26 atana District MJA-te budget tur pharh a ni a; MJA General Conference, 2025-in a rel anga MJA Button Badge siam thar chu MJA President-in a tlangzarh a ni.

GST sawiho

Mizoram Resource Mobilization Committee (MRMC) hnuaia Sub-Committee on Tax and Non-Tax chu an chairman Haukhuma Hauzel hoin September 25, Ningani khan an ṭhukhawm a; GST aṭanga sorkar chhiah hmuh a pun theihna tura hmalak dan tur an sawiho. Tarlan danin, danin a phût angin sumdawng/dawrkai zingah kum khata thil a hralh chhuah chu cheng nuai 20 a tlin chuan GST registration a nei ngei tur a ni a, dawrkai/sumdawng zinga thla khata cheng nuai 1.75 hmu tling chin chu in register ngei tur a ni.

Thingphunte tifai

Lunglei khawpuia sorkar department, zirna-in leh pawl hrang hrang 56 chuan nimin khan Lunglei District Level Committee on Green Mizoram (DLCGM) thu chhuak bawhzuiin Green Mizoram Day 2025 puala Lunglei tui lakna hnar, Pukpui ram chhung Tlawng leh Pialthleng panna kawngpui sira thing ṭiak 1,200 vel an phunte tihfai hnatlang an nei a; thing phunte hi a la nung ṭha hlawm viau nia hriat a ni.

Tlan phal lo

Aizawl SP Rex Zarzoliana Vanchhawng chuan thuchhuah siamin, October 21-23, 2025 chhunga Sakawrdaia YMA General Conference neih turah Tuirial - Mauchar (NEEPCO) kawng kaltlanga palaite an kal theih nan JCB hmangin kawng siamṭhat hna thawk mek a nih thu leh, chak zawka kawng siamṭhat hna thawh a nih theih nan September 29 - October 15, 2025 chhungin Tuirial leh Mauchar (NEEPCO) inkar kawngah lirthei tlan phal a nih loh thu a tarlang.