Zirlaite'n private school aia sorkar sikul an bawh theihna atan ṭan la turin chah

Education minister Dr Vanlalthlana chuan sorkar sikul zirtirtute chu private school aia sorkar sikul zirlaite'n an bawh zawk theihna atana theihtawp chhuah turin a chah.

September 24 - 25, 2025 chhung khan Education Minister hian Mamit district chhunga sikul ṭhenkhat - Govt. Lallen High School, Govt. Phuldungsei High School, Pukzing RMSA Secondary School, Dapchhuah RMSA Secondary, Dapchhuah Adhoc Middle School leh Govt. Dapchhuah Primary School-te a tlawh a ni.

Dr Vanlalthlana chuan zirtirtute chu an intuai hriam reng a ngai tih sawiin, "Tunlaia thil thleng leh thiamna chhuak thar zirtir zel thei tura textbook pawn lama mi zirtir tel ṭhin a pawimawh. Sokar sikula zirtirtute chu qualified teacher an ni a, zirna mana chhungkaw sum chhuak venpuitu an ni thei. Private school aia zirlaiin an bawh zawk theih nan theihtawp chhuah ang cheu u," a ti.

Zirna hi lehkha zir ringawt a ni lo tih sawiin Education Minister chuan, "Nun kawng inzirtirna pawh a huam vek. Khawtlang leh ram dam nan leh hma huna rilru hahdam tak neih theihna chu zirna hi a ni," a ti a, zirna chu zirtirtute chauh ni loin, nu leh pa leh khawtlang puma ṭanrualnaah a innghah thu a sawi.

Dr Vanlalthlana chuan MBSE-in academic session thar aṭangin class IX-ah common question exam a buatsaih tur thu sawiin, "National level exam JEE leh NEET-ahte Mizo zirlaite an tih ṭhat zawk theihna tur leh zirtirtute ṭang zawka siamtu tur a ni. Hei bakah hian SCERT chuan elementary school-ah common question (Standardized Assessment for Elementary Schools - SAfES) a buatsaih dawn," a ti.

Education Minister hi Samagra Shiksha state project director C Lalthanzira leh Mamit District-a Education department official-te'n an ṭawiawm a ni.