PM Awas Mela - Shehri leh Lok Kalyan Mela hawng

Urban Development & Poverty Alleviation (UDPA) secretary Lalmalsawma Pachuau chuan nimin khan Aijal Club Park-ah UDPA buatsaih 'PM Awas Mela - Shehri’ leh street vendor-te tan ‘Lok Kalyan Mela’ a hawng. PMSVANidhi scheme hnuaiah Mizorama street vendor mi 2,586 hnenah ṭanpuina pek a nih tawh thu tarlan a ni.

Lalmalsawma Pachuau chuan, mipui tana duan sawrkar scheme hrang hrang hnuaia hamṭhatnate mipui tam zawkin an dawn theih nan sorkar chuan hma a lak thu leh chak zawka thawh zel an inhuam thu a sawi a, "Hamṭhatna dawngtute chu ram hmasawn nana sorkar progress partners an ni a, ṭanpuina sum leh loan in dawnte hi a hmanna tur dik taka in hman a pawimawh," a ti a, mipui tam zawkin hamṭhatna an dawn theih nan bank-te nena thawhhona ṭha neih a pawimawh thu a sawi.

Mela hawnna inkhawm hi UDPA director Jacob Lalawmpuia’n a kaihruai a; UDPA joint director RL Zidinga'n hmalakna hrang hrang a tarlang a ni.

Lok Kalyan Mela campaign hi PM SVANidhi hnuaia street vendor-te dinhmun chawikanna tura sorkar hmalakna niin, he campaign hian a tum ber chu - PM-SVANidhi Scheme hnuaia loan dil thar duhte tana hun siamsak te, scheme hnuaia loan lo dil tawh zinga la pek lohte hnena loan pek te, loan dilna lut tawh zinga bank lamin an dilna a thawn let lehte ennawn bakah, loan la tawh zinga digital payment la hmang lote hman tir tura puih te, Food Safety lama thawkte nena ṭang hoa thianghlim zawka eitur an siam theihna tura zirtir te, loan la tawhte leh an chhungkaw member-te social economic profiling tihsak a, welfare scheme hrang hrang an chhawr ṭangkai theihna tura hmalakte a ni.

Angikaar Campaign ‘PM Awas Mela - Shehri’ hi PMAY-Urban hnuaia insak ṭanpuina chungchang mipui tam zawkin an hmelhriatna tura sorkar hmalakna a ni a; he campaign hian a tum chu PMAY – U hnuaia ṭanpuina dawngtuten PM Surya Ghar:Muft Bijli Yojana (Rooftop Solar Subsidy Scheme) leh PM SVANidhi te an hmelhriat a, chumi hmanga hamṭhatna an dawn theihte inhriattir a ni. Angikaar Campaign chhung hian insak ṭanpuina dawng tawhten an insak laia harsatna an tawhte an thlen theihna tur help desk buatsaih a ni.

Lok Kalyan Mela:

* Mizoramah PMSVANidhi scheme hnuaiah hian street vendor mi 2,586 hnenah loan vawi khatna Rs 10,000 ṭheuh pek a ni tawh.
* Mi 2,586 zinga 751 hnenah loan vawi hnihna Rs 20,000 ṭheuh leh mi 123 hnenah loan vawi thumna Rs 50,000 ṭheuh pek a ni tawh.
* Street vendor-te hnena loan pek tawh zawng zawng hi cheng vbc 4.98 a ni.
* PM-SVANidhi Scheme tharah hian loan vawi khatna chu Rs 15,000-ah tih pun niin, loan vawi hnihna pawh Rs 25,000 a ni tawh.
* Loan latu street vendor-te hnenah credit card pek an ni ang.
* Street vendor loan dil duh (SBI bank account nei)-te tan Sept. 29, 2025 khian SBI Regional Business Office, Zarkawt-ah a dil theih dawn.
* Dawrpui Multipurpose Hall Committee room-ah September 30 & October 1, 2025-ah dil theih dawn bawk.

PM Awas Mela - Shehri:

* PMAY-U hi Mizoram puma census town 23-ah kalpui a ni a, beneficiaries 36,789 awmin, mi 23,813-ten in an sa zo tawh.
* In la sa zo lote chuan October, 2025 ralhma ngeiin an in sak laite an sa zo tawh tur a ni.
* In an sak stage tinah UDPA Directorate-ah in report tur a ni.
* Insak ṭanpuina dawn theih zat chu central sorkar aṭangin Rs 2,25,000 leh state sorkar aṭangin Rs 25,000 a ni.