Sorkar hmalaknate a report-na tur dika report a pawimawh - SYS Minister

Sports & Youth Services (SYS) minister Lalnghinglova Hmar hoin September 25, Ningani khan a pisaah Ministry of Youth Affairs and Sports hnuaia MyBharat portal leh ṭhalai kaihhnawih portal danga ṭhalai tam zawk ziahluh dan tur chungchang sawiho a ni. SYS Minister chuan sorkar hmalakna hrang hrangte a report-na tur dika report a pawimawh thu a sawi.

Lalnghinglova Hmar chuan, sorkar laipuiin portal kaltlangin ṭhalaite tan scheme pawimawh leh ṭangkai tak tak a puanzar ṭhin thu a sawi a, "MyBharat chauh ni lo, ṭhalai kaihhnawih hmalakna hrang hrangah kan tel ve zel a ṭul a, Mizo ṭhalaite an inziahluh tam tawk loh avangin heng portal kaltlanga hamṭhatna awm theite an chân phah ṭhin," a ti.

Tunlai khawvelah hnathawh dan leh hmalakna tam tak chu data hmanga teh a nih tawh thu sawiin Minister chuan, "Sorkar hmalakna hrang hrangte a report-na tur dika report a pawimawh takzet. Report-na tura report a nih loh chuan thawk ṭha lo angin kan lan phah thei a ni," a ti bawk.

Sawihonaah hian SYS secretary V Lalsangliana bakah SYS, Higher & Technical Education, School Education leh ICT department aiawhte an tel a; NCC leh NSS-a tel thar turte chu MyBharat portal-a in register ngei tur tih ni se, zau zawka zirna-ina hmalak a nih theih nan Higher & Technical Education leh School Education department-ahte MyBharat portal chungchang hrilhfiahna leh zirlai zingah registration drive kalpui tura ngenna siam ni se, an ti bawk.

Sawihonaa tarlante
* MyBharat portal registration drive hi kum hnih vel kalpui tawh niin, khaw hrang hrangah YMA leh YLA-te nen thawkhoa ṭhalai kokhawmin, a hmuna registration tih (on-the-spot registration) kalpui ṭhin a ni.
* Zirna-in, a bikin NSS unit awmna college leh school-ahte mass registration drive kalpui mek a ni a, October 15, 2025 thleng neih tur niin, tun dinhmunah Mizoram aṭangin mi 40,000 vel an in register tawh.
* Viksit Bharat Young Leaders Dialogue-a intihsiakna - quiz competition chu MyBharat portal aṭanga in register tur niin, Mizoram aṭangin mi 3,498 an in register tawh a ni.
* MyBharat portal-ah hian ṭhalai kum 15 - 29 inkarte in register theih a ni a, college/university, NGO, youth club, MSME leh business dangte pawh partner anga in register theih a ni.
* Portal kaltlang hian sorkar scheme leh programme hrang hrang, internship leh fellowship tih theihnate puanzar ṭhin a ni.
* Portal kaltlang vek hian dilna pawh thehluh ṭhin a ni.
* Sorkar hmalakna ṭhenkhat - entrepreneurship scheme leh leadership programme-ahte portal-a in register-te duhsak theihna a awm.