Thingdawlah Observation Home hawng

Social Welfare, Women and Child Development secretary Lalzarmawii chuan nimin khan Kolasib district-a Thingdawl ICDS Complex-ah a bika naupang enkawlna tur Observation Home a hawng. Home hi naupang 25 leh thawktute len theihna tura Rs 87,45,000 senga sak a ni.

Zoramthangi Chhangte chuan, home hawn thar chu building pakhat hawnna mai ni loin, ram leh hnam tana pawimawh a nih thu a sawi a, "Dan nena inrem lo naupangten ngai awha kawng dik an lo zawh a, insiamṭhatna an lo neih theihna hmun tur a ni a, he Home-ah hian naupangte chu an thil tih sualte hriatsak reng lo in, anmahni chawikânna tur thil hrang hrang buatsaih a ni," a ti a, zirna an mamawhte an dawn dawn thu leh khawtlang leh ram tan mi chenfakawm an lo nih chhoh theih nan enkawl an nih dawn thu a sawi.

Observation Home-ah hian naupangte chu kum 18 an tlin thleng an awm thei tih sawiin Zoramthangi chuan, "Psychosocial counselling leh counsellor-te kaltlangin naupang enkawl dan hrang hrang pek a nih bakah, case work - anmahni leh chhungkaw dinhmunte zirchian ṭhin a ni a, individual care plan te, medical care te, recreational activities-te thlenga kalpui a ni," a ti bawk.