Ei leh in zuar/siamte tan license neih ngei a ngai

Directorate of Health Services (DHS) chuan hriattirna tichhuakin, Food Safety and Standards Act, 2006-in a phût angin ei in siam leh zuara sumdawnna kalpui zawng zawngte chuan food license (FSSAI license) an neih ngei a ngai tih a tarlang a; AMC area-a awmte tan October 1-10, 2025 chhungin license siam runpui buatsaih a ni dawn.

DHS tarlan danin, food license neih ngai zingah - eichawp dawr, thingpui dawr, restaurant, cafe, hotel, guest house, homestay, hostel, caterer, chhang siam, chawhmeh zuar, sa dawr, theitui siam, kawng kama ei leh in dawr siam (street food vendor) zawng zawngte a huam vek a; license nei loa sumdawnna kalpui chu Section 63 of Food Safety and Standards Act, 2006 bawhchhiatna niin, thla ruk chhung lung-in tan leh cheng nuai 5 thleng chawi theihna a ni.

Food license hi district tina Sr. CMO office-ah siam theih a nih thu tarlangin DHS chuan, "AMC area-a awmte tan chuan Directorate of Health Services (Old Building), Dinthar hi license siamna hmun a ni a, engtik lai pawhin pan theih reng a ni. AMC area-a awmte tan October 1-10, 2025 chhungin license siam runpui buatsaih tum a ni a, voter ID, passport size photo leh Gpay hmanga fee pek theihna tur mobile phone-te ken tur a ni," a ti a, license la nei lo zawng zawngte chu siamtir vek turin a hriattir.