World Rabies Day hman a ni

September 27, Inrinni khan Mizoram hmun hrang hrangah World Rabies Day, 2025 hman a ni a, ui eng emaw zat ui â hri danna a thlawnin pek a ni.

World Rabies Day hmanna hmunahte hian a thlawnin ui â hri venna damdawi (anti-rabies vaccine) pek beihpui thlak a ni a; Mizoram pumah vaccine hmangin ui 2,600 chiau a ni.

Aizawlah chuan Mizoram State Veterinary Council (MSVC) leh Indian Veterinary Association (IVA), Mizoram buatsaihin State Veterinary Polyclinic Hospital, Ramrikawna Animal Feed Plant leh Zemabawk North YMA Hall-ah te World Rabies Day hman a ni.

State Veterinary Polyclinic Hospital-aWorld Rabies Day hmanna inkhawm buatsaih chu AH&Vety additional director Dr M Zohmingthangi'n a kaihruai a; MSVC president Dr Lalremliana'n thu sawiin, ui â hri (rabies) chu natna hri hlauhawm tak a nih avangin a venna damdawi (vaccine) ṭha taka lak a pawimawh thu a sawi.

Dr Lalremliana chuan, rabies chu a vei tawhte'n an thihpui ngei ngeia ngaih a nih thu sawiin, "Dam chhuak sawi tur tlemtê chuah an la awm. Ram changkangah chuan an buaipui vak tawh loh laiin, Asia leh Africa-ah mi tam takin an la thihpui a, a bikin ui seh vangin case a la tam phah hle," a ti.

Khawlaiah neitu nei lo ui chhuak an awm loh avang te, vaccine pek ngaih pawimawh vang leh veterinary ni pawimawh bikah free vaccination leh health camp-te ṭha taka kalpui ṭhin a nih avangtein Mizoramin rabies nuaibo theihna kawng a la neih ṭhat thu Dr Lalremliana chuan a sawi.

Animal Feed Plant, Ramrikawna Rabies Day hmanaah Indian Veterinary Association, Mizoram president Dr Robert Rualthankhuma'n thu a sawi a, "India ram pumah kum 2030 ral hma ngeia ui â hri nuaibo tuma theihtawp chhuah a ni a, ui â hri nuaibo turin vaccine pek mai bakah, uiin a sehte'n hri venna vaccine an lak nghal thuai a ṭul," a ti.

Wolrd Rabies Day hi Anti-Rabies Vaccine (ARV) hmuchhuaktu Louis Pasteur thih champhaah kum 2007 aṭang khan kum tin September 28-ah hman ṭhin a ni a, kuminah hian Pathianni a nih avangin Inrinni khan hman a ni.