UPSC Challenge Inter College Quiz-ah MCC aiawhte an thiam ber

Labour, Employment, Skill Development and Entrepreneurship (LESDE) minister Lalnghinglova Hmar chuan September 27, Inrinni zan khan Ignite Studio-ah Mizo Students' Union (MSU) buatsaih 'LESDE UPSC Challenge Inter College Quiz Competition 2025' kharna a hmanpui. Quiz-ah hian Mizoram Christian College zirlaite pakhatna an ni.

Lalnghinglova Hmar chuan, Mizo ṭhalaite chu UPSC hnuaia exam hrang hrangte hmachhawn tura chawh phûr an ngaih thu a sawi a, "LESDE department hnuaia Mizoram Building & Other Construction Workers Welfare Board (MBOCWWB) hi mipuiin an hriat chian a, an inziah luh a, a hnuaia hamṭhatna an dawn theihte an hlâwkpui theih nan Quiz hi LESDE chuan a sponsor a, ṭhalaite’n eizawnna rahbi an tuk theih nan MBOCWWB hian a pui ṭhin," a ti. Minister hian quiz-a ti ṭhate hnenah lawmman a hlan a ni.

UPSC Challenge Inter College Quiz-ah hian college 14 aṭangin zirlai pahnih ṭheuh an tel a; Mizoram Christian College zirlai Rohmingliana Renthlei leh Remsiamkima te chu pakhatna niin, thuchei leh Rs 30,000 an dawng. Pahnihna Serchhip College zirlai Lawmsangzuala leh Lalhunmawii ten Rs 10,000 leh pathumna Hrangbana College zirlai Lalruatfela leh Lalbiakfela ten Rs 7,000 an dawng.

Champion team hi Mizoram Youth Commission (MYC) hnuaia Mission UPSC kaltlangin a thlawnin UPSC coaching an kal dawn a ni.