Lemziaka intihsiak buatsaih a ni

Art & Culture department leh North East Zone Cultural Centre (NEZCC) chuan September 27, Inrinni khan Aizawl DIET Auditorium-ah 'Cultural & tradition' tih thupui hmangin 'Painting workshop on Viksit Bharat' an buatsaih a, Art & Culture minister C Lalsawivunga'n a hmanpui.

Lemziaka intihsiakna hi hlawm (category) thumah ṭhen a ni a; kum 30 chung lam (professional category)-ah mi 21 telin, pawl 12 chung lam leh kum 30 hnuai lam (young artist/college student category)-ah mi 40 leh pawl 12 hnuai lam (school students category)-ah mi 98 an tel.

Professional category-ah C Remruatkima, Dinthar pakhatna niin Rs 1,00,000 a dawng a, young artists/college student category-a pakhatna F Malsawmzuala, College Vengin Rs 25,000 leh school students category-a pakhatna Ruthi Lalhmangaihi, Mary Mount School-in Rs 10,000 a dawng.

Minister C Lalsawivunga chuan, "Lemziak hian thu tam tak a hril theih avangin lemziak mite hi an ropui tak zet a ni," a ti a, an kal zelna turah duhsakna a hlan. Minister hian lemziak intihsiaka ti ṭhate hnenah lawmman a hlan a ni.