Bengngawngte Ni hman a ni

National Programme for Prevention and Control of Deafness (NPPCD) hnuaiah sorkar kum kal meka April-July 2025 chhung khan Mizoramah benga harsatna nei mi 11,166 enfiah a ni a, bengngawng mi 2,029 hmuh chhuah an ni.

September 26, 2025 khan NPPCD huaihawtin Directorate of Hospital & Medical Education Auditorium-ah World Day of the Deaf (Bengngawngte Ni) hman a ni. He hunah tarlan danin, April-July 2025 chhungin NPPCD hnuaiah benga harsatna nei mi 11,166 endik aṭangin bengngawng 2,029 hmuh chhuah a ni a; beng natna nei mi 2,517 en tawh niin, mi 43 hnenah bengdár pek a ni.

World Day of the Deaf hmanna inkhawm hi HME deputy director Dr Robert L Khawlhring-in a kaihruai a, Person with Disabilities commissioner Vanlaldiki Sailo khuallian a ni. Deaf puala Inter School Speech Competition-a ti ṭhate hnenah lawmman hlan a ni bawk.

World Day of the Deaf hi September 1958-ah hman a lo ni tawh ṭhin a, Mizoramah chuan kumin hi vawi 11 an hmanna a ni.