Phal lohnaah periodic patta dil an tam Settlement Office-in an hnâwl ngam lo
Tun hnaiah Kolasib khawpui huam chhung (Thingdawl), Bilkhawthlir town area leh Kawnpui town area-ah periodic patta diltu an tam hle. Mizoram sorkar dan ang chuan, khawpui huam chhung (town area)-ah periodic patta pek phal a ni lo a; mahse, Kolasib district-a Settlement Office (SO) chuan thu an hmuh avangin an lo hnâwl ngam lo.
Kolasib aṭanga thu dawn danin, periodic patta hi national highway (NH) no. 306, four lane-a siam turin a paltlang tura hriatah an dil hlawm a ni. National Highways and Infrastructure Development Corporation Ltd. chuan NH-306 chu four lane-a siam turin an enfiah (survey) mek a, a paltlang tura ngaihah Kolasib SO chuan periodic patta dilna 165 tun hnaiah an dawng.
Mizoram Land Revenue Laws-ah chuan periodic patta hi notified town-ah pek theih a ni lo a; Chapter V Section 34 ang chuan, periodic patta chu agriculture atan chauh, notified town area páwna pek tur a nih thu tarlan a ni.
Phal lohna hmuna periodic patta dilna hi chung lam aṭanga lehkha an hmuh avangin Kolasib SO chuan an hnâwl ngam lo a, dilna hmun enfiah turin surveyor pali tir turin ruahmanna an siam a ni.
Hetih lai hian, Land Revenue & Settlement (LRS) deputy director Zonunthari chuan Kolasib a tlawh dawn a, periodic patta dilna chungchang chu Kolasib SO-a thawktute a sawipui ang.
Vanglaini palai zawhna chhangin LRS director Angela Zothanpuii chuan, Kolasib SO aṭangin notified town area-a periodic patta dil an tam chungchang an dawn tawh thu a sawi a, "Kan dawnna a la rei lo a, thil pawimawh dang a awm avangin hmalak dan tur kan la ngaihtuah hman lo," a ti.
Periodic patta hi Kawnpui town area-ah mi 130, Kolasib town (Thingdawl) area-ah mi 19 leh Bilkhawthlir town area-ah mi 16-in an dil a; diltu tam zawk chu Aizawl lam mi an nia thu dawn a ni.