Khawruhlian-in kawng dan tum an sût; Sorkarin kawng chhia a ngaihven - PWD Minister
Assembly Speaker leh PWD Minister bakah, PWD hotute chuan nimin khan Khawruhlian hnuaia kawng chhia an enfiah a; Khawruhlian NGO Coordination Committee hruaitute nen an inkawm hnuah, Khawruhlian NGOCC chuan kawng dan an tum an sût. PWD Minister chuan, hmun hrang hranga kawng chhiate sorkarin a ngaihven reng thu a sawi.
Khawruhlian NGOCC chuan, an khaw chhung luh leh chhuahna kawngpui chu September 30, 2025 ral hmain a nih tur anga siam tura hmalak a nih loh chuan tiam chin awm loin an khaw paltlang theihna kawng zawng zawng dan an tum thu an lo puang tawh a ni.
Assembly speaker Lalbiakzama (bialtu MLA) leh PWD minister Vanlalhlana te chuan nimin khan Khawruhlian an pan nghal a; kawng chhe lai an enfiah bakah, Khawruhlian YMA Rûnah NGOCC hruaitute nen an inkâwm.
PWD Minister chuan, khawtlangin hna chhunzawm rem an ti tlang a nih chuan kawng siam chhunzawm nghal a nih tur thu a sawi a; hei vang hian Khawruhlian NGOCC chuan kawng dan an tum chu an sût nghal a ni.
Speaker Lalbiakzama chuan, Khawruhlian NGOCC-in an thil phût tihhlawhtlin ngiat nana national highway dan an tum chu ṭha lo a tih thu sawiin, kawng dan an rel hmain amah (bialtu MLA) nen pawh ṭha taka sawi hmasak ni se a duh thu a sawi a, "Kawng siam mek a ni a, uluk taka vil a ni bawk. Harsatna a awm a nih chuan bialtu MLA nen hmalak dan tur sawiho zel ni se, thuneitu sang zawk dawr a ngai a nih pawhin bialtu MLA ka nih angin ka inpeih reng a ni," a ti.
PWD minister Vanlalhlana chuan, hmun hrang hranga kawng chhiate sorkarin a ngaihven reng tih sawiin, "A zavaia siamṭhat vek a harsa a, hmatiamin chak takin hma kan la zel a ni," a ti a; ruahtui hul veleh hmun hrang hrangah hna ṭan nghal a nih dawn thu a sawi.
Khawruhlian khuain harsatna an tawh chu sorkarin a hriatpui thu sawiin Vanlalhlana chuan, "SLT company-te'n kawng an siam mek a, an hnathawh ṭhat leh ṭhat loh pawh PWD- te'n uluk takin an vil reng. Harsatna a awm chuan department leh sorkar a inhawng reng a, mahni ṭha tih dana thutlukna siam loin, dawhkan kîlhoa sawi fel turin sorkar a inhawng reng a ni," a ti.
Thu dawn danin, Khawruhlian khaw chhung kawng siam mek a nih laiin Khawruhlian Joint YMA chuan May 30, 2025 khan fûr laia hnathawh châwl tur leh thu an pek leh hma chu hna thawk chhunzawm lo turin kawng siamtute an hriattir a; hna thawk leh tura YMA-in thu an pek leh hmain NH kawngpui a min a, harsatna a thleng ta a ni.