Hulhliap SSC batch 4-na ṭan a ni

Mizoram sorkar, Synod Revival leh Central YMA te ṭanghoin ruihhlo ngaite chhanchhuahna atana an buatsaih, Hulhliap Short Stay Centre batch 4-na chu nimin khan ṭan a ni a, ni 20 chhung a awh ang.

Hulhliap SSC batch 4-naah hian mi 200 vel an lut a; an luh hmain nimin khan Central YMA Hall leh Bawngkawn YMA Hall-ah thil pawimawhte hrilh an ni.

Camper-te dawn­sawnna leh thlahna inkhawmah hian Hulhliap SSC Core Committee chairman Malsawmzuala Ralte, Mizoram Youth Commission chairman bakah, Aizawl SP Rex Zarzoliana Vanchhawng, Excise & Narcotics joint commissioner Peter Zohmingthanga leh Central YMA treasurer Roneihthanga ten thu an sawi.

Hulhliap SSC-ah hian ruihhlo ngaite chu Synod Revival Camping Centre, Sihphir Neihbawihah ni 20 chhung enkawl an ni dawn. A tir lam ni 10 chhung chu detoxification hun atan hman tur a ni a, chumi zawhah ni nga chhung psychological counselling neih tur niin, a tawp lam ni nga chhung revival camping neihpui an ni ang.

Hulhliap SSC batch hmasa lama chhuak tawh mi engemaw zat chu kut themthiam zirna (skill development trainning) neihpui an ni tawh a; sorkar aṭanga certificate dawngin, mahni kea dinga eizawnnna bul ṭan pawh an awm nual tawh niin sorkar thuchhuah chuan a tarlang.