KHAWTHLIR

ANC-in thisen pe

Aizawl North College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 110 an pe a, petute mipa 81 leh hmeichhia 29 an ni.

Ramsa tihhlum khap

Kolasib district-a Saipum khaw ramah tun hnai khan African Swine Fever vanga sanghal thi hmuh a ni a; hei vang hian district magistrate Robert C Lalhmangaiha chuan Kolasib district-ah ramsa pêl leh tihhlum khap a nih thu a puang. Ramsa sa a rêpin emaw, a hringin emaw zawrh phal a nih loh thu leh, ramsa sate chu lei/ei phal a nih loh thute a tarlang bawk.

Kuhva phurh khap

Serchhip district magistrate Paul L Khuma chuan thupek tichhuakin, Serchhip district chhungah dan loa kuhva lak luh leh phurh phal a nih loh thu a puang. Serchhip district khaw hrang hrangah dan loa kuhva phur lirthei an kal ṭhin tih hriat a nih thu tarlangin Magistrate chuan, thupek zâwm lote chu BNS Section 223 hmanga hrem theih an nih thu a tarlang.

Bill siamsak rêl

Serchhip District DAY-NULM Executive Committee chu nimin khan bawrhsap Paul L Khuma hoin an ṭhukhawm a; Serchhip District Hospital rama Patient Attendants Shelter sak mek leh Family Shelter thawm ṭhat hna thawhte an thlirho. Contractor-te'n chak zawka hna an thawh zel theih nan running bill 45% siamsak a, thuneitute hnena thehluhsak an rêl a; Family Shelter thawm ṭhat hna chhunzawm vat a nih theih nan hmalak ni se, an ti.

Kumtling loa inneih khapna dan inzirtir

Saitual District Hub for Empowerment of Women chuan nimin khan DC conference hall-ah kum tling loa inneih khapna dan, The Prohibition of Child Marriage Act, 2006 chungchang inhrilhfiahna an buatsaih a, bawrhsap Dr Lalngura Tlau-in a hmanpui. Prohibition of Child Marriage Act, 2006 leh inneih hma lutukin taksa leh rilrua nghawng ṭha lo a neihte inzirtir a ni a, zawhna leh chhanna hun hman a ni.