KHAWTHLIR

Sihphir Bial KṬP chuan January 9, Inrinni khan Sihphir Kohhran Hall-ah thisen pek an huaihawt a, Synod Hospital tan thisen unit 43 an pe a, petute mipa 36 leh hmeichhia pasarih an ni.

AH & Vety department hotute hnen aṭanga thudawn danin, tun hnaia Avian Infleunza (Bird Flu) a len mek avanga India ram state pariata inkhuahkhirhna kalpui mek a nih laiin, Mizoramah Bird Flu hi tun thlengin hmuh a la ni lo. He hri lakah hian Mizoram chu a inralring reng a, district tinah Rapid Response Team te chu koh theih mai turin an awm reng a, invenna tur damdawi leh hmanruate pawh dapkhawm mek a ni.

State Election Commission (SEC) chuan hriattirna chhuahin, Mizoram Municipalities Act, 2007 tlawhchhanin Aizawl Municipal Corporation (AMC) inthlanna turah municipal returning officer leh assistant municipal returning officer atan Mizoram sorkara thawk officer a ruat thar. MRO leh AMRO atan hian mi 19 ve ve ruat a ni a, AMC ward 19 chu a mal tê têin an inchan sem a ni.

Nimin khan State Referral Hospital-ah Covid-19 vei mi pahnih dah luh an ni a, anni nen mi 21 enkawl mek an ni. SRH-ZMC Bulletin tarlan danin, ICU-a enkawl an awm rih lo a, Isolation ward-a awm vek niin, an zinga pali chu oxygen pek mek an ni. Mi 21 zingah kum 60 chung lam mi panga leh kum 14 hnuai lam pakhat an awm.

Khawzawl district magistrate Zothanmawia chuan thupek chhuahin, Khawzawl district-ah vawk, vawk sa rêp leh vawk sa aṭanga siam reng reng lak luh phal a nih loh thu a puang.Khawzawl Bawrhsap chuan, vawk damlo neite chu Vety hospital-ah hriattir vat turin a hriattir a; vawk thi rêng rêng phûm vek tur a nih thu te, vawk hrisel chauh talh tur leh vawk damlo hralh phal a nih loh thute a tarlang bawk. Thupek hian thla hnih chhung a awh ang.