Health Minister leh Power Minister ten Civil Hospital-a VIP line pek dan tur an en

Health & Family Welfare minister Lalrinpuii leh Power & Electricity minister F Rodingliana te chuan nimin khan Civil Hospital, Aizawl an tlawh a, Civil Hospital-a kawlphetha (VIP line) pek theih dan tur an en.

Sorkar thuchhuah tarlan danin, Aizawl Civil Hospital-a generator lian a chhiat avangin kawlphethaah tun hnai khan harsatna an tâwk a, hei hian damlote leh damlo enkawlna kawngah harsatna a thlen a ni.

Civil Hospital hotute chuan CT scan, MRI, Dialysis Centre, operation theatre leh ICU-ahte kawlphetha an mamawh reng thu leh Cath Lab peih ṭêp atan châwl loa kawlphetha mamawh a nih thute minister-te lo an hrilh. Minister-te hian Civil Hospital-a kawlphetha mamawh tam zual bik - CT scan, MRI, Dialysis Centre, ICU leh operation theatre te an tlawh a ni.

Minister-te leh Civil Hospital damdawi-in hotute chuan electric VIP line mamawh a nih dan te, line thar aṭanga Civil Hospital tana darkar 24 khaihlak loa kawlphetha pek dan turte an ruahman a; chu'ng atana sum mamawh turte chu sorkarah a rang thei ang bera dil tum a nih thu an sawi.

PMJVK sum hmanga Civil Hospital, Aizawl Block A leh Block B sak dan tur tlangpui bakah, Trauma Centre-a insuan lut tura hmalak ngai ṭhenkhatte an thlirho bawk.

Power & Electricity minister F Rodingliana chuan, Civil Hospital, Aizawl huam chhunga high mast hun rei tak chhe tawh chu a rang thei ang bera siamṭhat dan kawng zawn a nih tur thu a sawi.

Civil Hospital, Aizawl enfiahnaah hian Hospital & Medical Education director Dr S Ngurchamliana, senior medical superintendent Dr Lalchhuankimi, Power & Electricity engineer-in-chief JH Malsawma, chief engineer pahnih Ngursailova leh Zodingliana bakah, department pahnih hotute an tel a ni.