Sorkar hna pawl 10 zo chin dil theihte pawl 8 zo chin tan ti turin sorkar ngen

Mizoram Poor Federation (MPF) hruaitute chuan nimin khan Aizawl Press Club-ah thuthar thehdarhtute an kâwm a; sorkar hna ṭhenkhat, pawl 10 zo chin dil theih tura tihte chu pawl 8 zo chin dil theih tura tihniam turin Chief Minister leh Home Minister an ngen thu an sawi.

MPF president Lawmthanga chuan, Aizawl leh thingtlangah zirna a inthlauh thu leh, harsatna vanga pawl 10 zir chhuak ve ta lote tan sorkarin ruahmanna siamsak se an duh thu a sawi a, "Khawsak harsatna vanga pawl 10 zir thleng phak lote'n Police leh Excise constable-te bakah, department hrang hranga group D leh driver hna lak turahte hna an dil ve theih nan ruahmanna siamsak turin Home Minister hnenah kan ngen a, vawiin hian Chief Minister hnena kan ngenna lehkha kan thehlut dawn," a ti.

Mizoram Universal Healthcare Scheme (MUHCS)-a sorkar hmalakna fakin Lawmthanga chuan, "Ministry hmasaah khan healthcare-ah kan inziak lut ve bawk a, kan phur a rit ṭhin hle a, mi mawl tê tê leh chinchang hre lote'n kan senso bill kan buaipui a ngai. ZPM ministry-in MUHCS a duang a, bill buaipui a ngai ve tawh lo," a ti a, MUHCS chu mirethei leh mi mâwl zawkte tan a thawventhlak thu a sawi.

Lawmthanga chuan, ZPM sorkar rorel dan chu miretheite thleng phak nia sawiin, "Sorkar kal tawh flagship programme Rs 3,00,000 sem khan mi rilruah hmun a chang thûk hle a, term khat chhungin a hmu tamin Rs 50,000-te an hmu a, a ṭhenin Rs 25,000 an hmu hman hrâm. ZPM ministry-ah chuan term chanve an la hman zawh hmain Handholding Policy hnuaia CM’s Special Package chu trade mil zelin bul ṭanna tur Rs 1,00,000 hmu," a ti.

Mizoram Synod hruaitute'n Synod Hospital-in MUHCS a zawm an remti chu lawmawm an tih thu leh private hospital-te pawhin an zawm thuai an beisei thu a sawi bawk.