Sept 2025-ah ruihhlo vangin mi 35 man, thubuai 27 ziak lut

Champhai District Narco Coordination Centre (NCORD) Committee chu nimin khan chairman Mohammad Aaquib, bawrhsap hoin DC conference hall-ah an ṭhukhawm. September 2025-ah Champhai district-ah heroin kg 6.054 man a ni a, ruihhlo kaihhnawihah Police leh Excise duty-te'n mi 35 manin, thubuai 27 an ziak lut tih tarlan a ni.

Meeting-a tarlan danin, September 2025 chhungin Champhai Police-in ruihhlo kaihhnawiha inhnamhnawih mi 25 manin, thubuai 19 an ziak lut. Ruihhlo an mante chu heroin kg 3.282, methamphetamine kg 74.852, alprazolam kg 4.470, codein gram 1.6, ruihhlo phurh nana hman lirthei ke li nei pahnih leh lirthei ke hnih nei pahnih a ni a; ruihhlo man zawng zawng hlut zawng chu Rs 11,66,56,800 hûa chhût a ni.

September 2025 chhung vekin Excise & Narcotics department-in heroin kg 2.772, methamphetamine kg 42.088 leh ganja gram 29.9 an man a; ruihhlo kaihhnawihah mi 10 manin, thubuai pariat an ziak lut. Ruihhlo phurhna atana hman lirthei ke hnih nei pahnih an man bawk.