Sazu hrai rûnpui huaihawt tum a ni

Agriculture & Farmers’ Welfare minister PC Vanlalruata hoin nimin khan a pisaah Agriculture department hotute'n rawṭhing tám vanga sazu puang chungchanga district hrang hranga hmalaknate leh hmalak zel dan turte an sawiho. Lunglei District Agriculture Office chuan, October 3, 2025-ah túrin sazu hrai rûnpui huaihawt an tum.

Ṭhutkhawma tarlan danin, rawṭhing tám vangin sazu a puang a, harsatna tâwk khaw 138 vel an awma hriat a ni. Agriculture department chuan DAO kaltlangin loneitute hnenah sazu túr (bromadiolone & zinc phosphide) an sem tawh a, sem hmabak eng emaw zat a la awm. Sazu puan nasatna khuaah chuan VC-te nen department-in túra sazu hrai rûnpui (rodent mass poisoning) an nei a ni.

Nimin khan Lunglei DAO chuan thuchhuah siamin, rawṭhing tám vanga Lunglei district-a sazu puanna hmunah October 3, 2025-ah túra sazu hrai rûnpui huaihawt a ni dawn thu a tarlang a; team pathum siam niin, Thingfal, Mamte, Thlengang, Ṭawipui North-I, Ṭawipui North-II, Mualcheng South leh Ramlaitui khuate an tuam dawn.

Lunglei DAO chuan, khawtlang hruaitute chu tûra sazu hrai ní aṭangin an khua ṭheuhah sazu/chêpa rêp zawrh leh thawn chhuah turte fimkhur taka veng tur leh a sa miin an ei loh nan hma la turin a ngen a; sazu leh chêpa (chepa lam chi) sate ei lo turin mipui a chah bawk.