State Referral Hospital-a thi Covid-19 vanga thi a ni lo

Covid-19 vei vanga SRH-ZMC-a enkawl Lakhi Dhan Chakma (57), Silsury, Mamit district chu nimin chawhnu dar 2:30 khan a thi a; Covid-19 a vei vanga SRH-a dah luh ni mah se, hripui a vei tawh lo (negative tawh) thung.

Sorkar thuchhuak tarlan danin, LD Chakma hi BP sáng leh natna dang nei sa a ni a, Aizawla private hospital pakhata enkawl a nih laiin December 21, 2020 khan Covid-19 positive a ni tih hmuh chhuah a ni a, pneumonia a nei bawk. Amah hi Silsury khua ni mah se, sample lakna/endikna Aizawl a nih avangin, Aizawl district case-ah ziah luh a ni.

SRH-ZMC aṭanga thu dawn danin, LD Chakma hi Covid-19 positive a nih avangin SRH-ZMC-ah enkawl ni mah se, January 5, 2021 khan Covid-19 lakah a fihlim (negative) tawh tih finfiah a ni. Hei vang hian ICMR portal-ah pawh Covid-19 positive thi anga chhinchhiah a ni lo tih thu dawn a ni.

Hetih lai hian, Mizoram sorkar thuchhuahah chuan LD Chakma hi Covid-19 vei thi zingah chhiar tel a ni. Negative tawh mah se, damdawi-in aṭanga a la chhuah loh avangin, thil tihchian ngai a awm dawn niin IDSP hotute chuan an sawi.